《PopWalk × WHOSMiNG旨在一喜》利市封 「日の幸」夠立體

黛安收到風，PopWalk天晉滙今年請嚟台灣人氣文青插畫家WHOSMiNG，設計咗一套4款《PopWalk×WHOSMiNG旨在一喜》虎年利市封套裝，同埋尊貴新春利市禮盒，當中最特別係「日の幸」立體利市封，以日本富士山做3D設計，揭起富士山後，可沿住虛線將招財虎、祈福神橋同日本少女圖案撕下，再放到利市封嘅插卡位，立體感及玩味十足。

至於尊貴新春利市禮盒，除咗包含利市封外，更附送帝苑酒店特選4種口味嘅「OR Tea」茶包㖭。

今個星期五（14日）起至本月31日，只要喺PopWalk天晉滙以電子貨幣即日消費滿$200，及用The Point by SHKP會員指定積分，就可以帶佢哋返屋企喇。利市封數量有限，換完即止㗎。