尖沙咀鐘樓再次鳴鐘

尖沙咀鐘樓自1921年開始報時，1950年停止運作，上周再次鳴鐘並舉行鐘聲啟動典禮。睇到呢個新聞，真係有開心溫暖嘅感覺。雖然未有機會聽過之前嘅鐘聲，但尖沙咀鐘樓絕對係好多人嘅回憶標誌。

每次睇粵語長片，畫面影住鐘樓下新馬司曾或鄧寄塵喺嗰度拉人力車，呢個就係我從影片睇到當時嘅香港。到青春少艾可以自己出街玩，就會約朋友仔喺五支旗杆度等，背景都必定睇到鐘樓。到今時今日，如果唔係重啟鐘聲嘅新聞出，我差啲遺忘咗呢個喺我心目中佔咗有分量嘅回憶。

鐘鳴鼎食係古代皇家貴族嘅等級禮儀。古人云︰「鐘能避邪，兼有鎮宅之能。」自古以來就有晨鐘暮鼓的傳統，鐘聲響起，天下百鬼退去，萬邪消失，鐘聲可以作為擺喺屋企做鎮宅物品，不過唔知點解，拍親啲鬼片，先拍響鐘，之後就有隻鬼出嚟，真係唔知係惹鬼定趕鬼？不過大鐘嘅鐘聲又的確畀到人莊嚴嘅感覺，例如教會崇拜開始、婚禮進行或除夕夜都會敲響鐘聲。

一講起鐘樓，大家第一時間應該會諗到英國大笨鐘，而高聳嘅鐘樓往往係各國最具標誌性嘅建築，部分更承載豐富嘅歷史文化內涵，成為國家象徵。

你又知唔知世界十大知名鐘樓喺邊？一、英國大笨鐘；二、美國費城市政廳鐘樓；三、沙特阿拉伯麥加皇家酒店鐘樓；四、布拉格天文學鐘樓；五、瑞士伯爾尼鐘樓；六、德國慕尼黑新市政廳鐘樓；七、美國明尼蘇達州明尼阿波利斯市政廳鐘樓；八、東京澀谷代代木大廈鐘樓；九、希臘風塔時鐘；十、伯明翰大學約瑟夫張伯倫紀念鐘樓。仲有雖然無入十大，但我心中意義重大嘅香港鐘樓！

（本欄逢周四刊登）