善用吸引力法則 願望必達

曾經hit又hot嘅《秘密》、《吸引力法則》等書籍，相信好多人都睇過，這些書教人只要懂得善用吸引力法則就能達成心中所望。講就容易，有幾多人真係有去練習運用呢？

點解無端端我攞呢本書同大家分享呢？有一日我遇到一個幾成功嘅人，佢對每件事都設下明確目標。佢話畀我聽，佢係從吸引力法則度練習出嚟。

吸引力法則好似好簡單，你必須知道自己想要嘅係乜，每日專注咁用心去凝聚積極嘅思想同慾望，用正面嘅力量去同宇宙互相吸引，負面力量都一樣。所以點解時時都喺度叫人日日發放正能量，就係咁嘅原因。語言同思想都帶有能量，因此講乜、諗乜都可能會成真，即係話正面嘅思想會產生正面結果，負面嘅情緒，需要有三個正面嘅思考去彌補。如果不停受負面情緒控制，咁真係唔慌有運行，衰運必定會發生。

專家話，當你專注於正面思想，你就會不知不覺咁引導自己嘅行為，因此可以影響你嘅健康、人際關係同成就。唔理係邊個專家講啦，呢番說話又好似幾有力量喎，至少跟住做唔會蝕底先啦。

原來時時陷入負面思考會吸引較低嘅能量，愈害怕失敗或不斷想像失敗後會發生嘅事，負面結果將自己嘅負面想像同樣咁真係產生咗出嚟，咁就弊咯！

嗰日我同林超榮無厘頭講開呢個吸引力法則，佢同我講，佢好想要一本克林頓自傳《我的一生》嘅繙譯版，但佢只買到簡體版，於是佢就好想好想能夠擁有呢本繁體字版。結果兩星期後，佢喺街見到有人執緊啲唔要嘅書，佢上前一望，其中就有佢想要嘅嗰本繁體版《我的一生》，佢嘅慾望果然因為諗得多而成真。聽完佢咁講，我真係覺得好勁！

想體現命運，大家不妨可以嘗試去學習控制，令自己時刻充滿幸福嘅力量。我敢肯定日子將會過得更充實、更快樂，至少一定唔會衰過舊時，絕對可以踢走唔開心嘅舊歷史！（本欄逢周四刊登）