2021要未雨綢繆

靈異嘅2020年，終於完啦！好喇好喇……好行夾唔送！

呢個庚子，唔理你係先進富裕國家，定係落後貧窮國家；有財有勢人士，定係無錢弱勢社群，話搞你就搞你，不分你我，終於搞殘成個地球。

喺踢走2020年嘅呢一刻，你係咪非常盼望2021年，我哋終於可以過番啲好日子？呢段時間，各國各地嘅預言家同玄學家都紛紛出嚟分析2021嘅運勢，結果？個個都話唔樂觀？吓？衰運仲未遠離？仲要捱？

迎接新年流流，我喺度講呢啲，你一定唔啱聽。但其實大家都預測到，庚子雖然終於離去，但佢所附帶嘅「蘇州屎」，臭味依然繼續不斷咁湧出嚟，例如好多行業都會因為捱唔住而出現倒閉潮，因此經濟壓力會影響好多人有負面情緒。

雖然年頭充滿盼望是必須的，但亦要有定心理準備。即係話︰天文台預測聽日會落雨，你做好準備帶把遮傍身，唔落雨會開心，萬一落雨都唔會濕身。我哋面對2021年，都應該抱住呢個態度同心境，咁先可以減少災難帶嚟嘅衝擊同傷害，嚟迎接未知嘅未來；對於可能發生嘅風險，做定適量嘅防範，防患未然，呢個亦係我令自己唔好太悲觀嘅方法。保住自己嘅樂觀尤其重要，因此要時時提自己「有危必有機」。

睇番以往庚子年嘅歷史，都可以講話係一個更替年號，嚟到呢個轉折點，全世界應該又要跟番個輪迴，又嚟經歷歷史性嘅改變了，社會環境同經濟好明顯正在調整中。我諗係時候要幫自己重新計劃方向。

改變、更替，雖然起初會好艱難，一向好地地喺熟悉嘅環境中，邊個願意走出comfort zone？唔習慣係必然。但當要逼虎跳牆嘅時候，不幸嘅事，或者有一日變相會成為祝福。到咗新轉折點，我哋不得不脫離過去，戰戰兢兢去開啟陌生領域，可能你會發掘到一啲自己以往從未諗過自己會有嘅實力同才能。

祝大家新年平安，2021年一定要令自己快樂！

（本欄逢周四刊登）