信和員工製逾百環保聖誕樹 實踐可持續發展承諾

過兩日就係聖誕節，原來環保聖誕樹都可以好靚㗎！黛安聽公關姊妹報料，信和集團今年舉辦升級再造聖誕樹比賽，鼓勵同事善用回收物料，升級再造成環保聖誕樹，超過100棵綠色聖誕樹已經誕生喇。

今次比賽反應熱烈，收到超過220份作品，逾450位員工及其親友參加。其中集團總部尖沙咀中心嘅員工，就利用場內租戶及員工提供嘅376個紅酒樽及350隻光碟，製作成新穎嘅環保聖誕樹。信和酒店嘅員工亦將回收物製作成聖誕裝飾，例如廁紙筒聖誕老人、瓶蓋雪人及咖啡膠囊聖誕鐘等等，藉此傳遞歡樂聖誕氣氛。

黛安聽信和集團集團聯席董事兼人力資源總監廖懿妮分享，期望從減廢、回收及升級再造方面着手，提升大家對都市廢物問題嘅關注，進一步實踐集團可持續發展承諾。其中一位參與比賽嘅前綫同事李啟邦都話，今次比賽不但有趣而且富深層意義，令員工善用回收物料，物創造出獨一無二嘅聖誕樹。信和員工咁用心製作，黛安都要畀個Like佢哋先得。