港鐵播放手語聖誕歌 教小朋友製作環保樂器

話咁快就到12月，雖然今個聖誕節要喺疫情下度過，但仍有好多精采節目等緊大家參加！黛安聽朋友講，港鐵將會喺綫上綫下舉辦唔同活動，希望大家保持社交距離嘅同時亦可歡度佳節。其中一個活動就係同黑暗中對話（香港）基金會合作，下星期二（8日）開始，喺車站同網上平台播放「手語聖誕歌」，現場可以睇下港鐵職員如何將港鐵元素加入聖誕歌；而網上手語學堂仲有遊戲玩，畀大家有機會學習簡單嘅鐵路及聖誕祝福手語。

另外，「環保爸爸」麥偉林（Norman）會喺今個月15日、17日舉行「DIY環保樂器音樂學堂」，示範用唔同材料製作環保小結他、搖鼓、沙槌等樂器！今個月19日港鐵又會同香港小童群益會合作，為小朋友搞網上課堂，畀佢哋整下樂器同教埋點彈聖誕歌，提早感受節日氣氛！