香港迪士尼「奇妙夢想城堡」揭幕 免費派15周年限量襟章

唔經唔覺，香港迪士尼已經15歲生日喇！黛安知道，佢哋今個月21日將展開「15周年奇妙慶典」，到時全城期待嘅「奇妙夢想城堡」亦會一齊揭幕，當中每座城塔同尖頂分別會融入13位迪士尼公主同女王嘅故事特色，豐富嘅顏色、標誌、圖案令人可以體會到新城堡嘅多元共融，好值得去睇同打卡！

公關姊妹分享，早前喺城堡華麗變身期間，邀請唔少賓客、米奇老鼠等迪士尼朋友，以心願卡形式分享夢想同願望，再將收集返嚟嘅心願卡收喺夢想寶盒，存放喺城堡最高尖塔，象徵變身後城堡凝聚咗大家嘅心願，鼓勵大家追夢。

想了解多啲城堡故事？香港迪士尼特備咗一個全新「奇妙夢想城堡故事展」，帶領賓客踏上一趟探索之旅，等大家可親身了解迪士尼幻想工程團隊由設計到完工嘅奇妙過程。展覽會聯同華特迪士尼動畫製作室、彼思動畫製作室共同創作，細訴多位迪士尼公主與女王嘅動人故事。