寺廟菜與精進料理

我有一班「佛系」好朋友。佢哋真係讀佛學的，每次同佢哋飯聚，必選素食。因此我呢個超級肉食愛好者，都食多了素齋菜。好多人，包括我認為食素就係食齋，其實「素」同「齋」係唔一樣嘅。

食素一般是以純素或全素進食，目的係為咗保護動物、保護環境或改善健康為出發點；而食齋就係按照宗教原則進食，例如佛教、道教等，目的通常係守戒或修行，甚至有啲規定係過咗中午就唔再進食。

食齋除咗唔食肉類外，一般連五辛或五葷都唔食。五葷係指蔥、蒜、韭菜、薤（小蒜）及興渠；前4款香料大家都應該知係乜，但興渠可能較少人認識。佢係一種印度香料，喺西域有出產，但香港或中國唔多見，係一種近似芫荽的葉子植物。當切斷其根和根狀莖，有乳汁狀流出，汁乾後，稱「阿魏」，係一種中藥。

而五辛多數係屬於香氣濃烈、含大蒜素嘅食材。傳統佛教認為食用呢啲含有大蒜素嘅蔬菜會令人產生慾念，容易引發憤怒情緒，因此唔主張食用。呢啲就係食素同食齋嘅分別了。對我而言，就算解釋咗，但當整好咗呢啲食物後，擺喺我面前，可能我都未必分得出內裏乾坤。所以如果真係要請「佛系」friend食佛系菜，請佢哋食寺廟菜又或者精進料理，就應該最穩陣。

而精進料理嘅「精進」一詞，源於菩薩道修行的6種方法之一，意指不懈怠放逸，之後成為咗日本佛門禪寺中嘅素食料理；廣義嚟講，亦可指無五辛嘅日本素食。

我之前喺首爾，都去食過做寺廟菜式嘅Temple Cooking Restaurant「山村」，主人金演植先生身為出家人多年，從寺院的素食料理中獲取靈感，亦根據唔同季節，選用上好嘅野菜嚟做出不同口味嘅料理。如果你都想感受一下禪意韓國料理，唔使飛去首爾了（基本上你想飛都飛唔到）……佛法無邊！終於有一間「寺剎飲食」的餐廳抵港了！

（本欄逢周四刊登）