Bob林盛斌早年加入TVB後廣為人熟悉，憑住佢出色嘅口才漸漸發圍，頻頻接廣告、司儀，再開公司成為老闆，撈到盤滿缽滿。
事業家庭兩得意嘅Bob生咗4個化骨龍，出名愛錫家人嘅佢舊年為妻兒可以有空間廣闊嘅屋企，生活舒適啲，一家六口搬到位於九龍塘嘅3層高獨立屋，地方之大令網民驚嘆，連圈中朋友C君都講笑話阿Bob屋企「大過地球」！
Happy Family！（Bob IG）
Bob屋企有咁大嘅活動空間，喺今次嘅疫情下可以話係盡顯「優勢」，就算留喺屋企唔可以四圍騰，小朋友都冇咁易悶親。日前，Bob就喺佢屋企出面嘅超大花園，放咗個大型吹氣游泳池。Bob同三Queen一King齊齊玩水消暑，Bob坐喺泳池角落，睇住小朋友玩得咁開心，Bob個腦原來有另一番幻想：「我當自己飲緊白酒香檳，同班𡃁模船P緊㗎嘞！」
（Bob IG）
有網民留言話叫佢小心畀Bob嫂扭耳仔，Bob就話Bob嫂好安心佢同啲「女」玩，又有網民留言話其實佢哋囡囡又何嘗唔係幻想同緊個古天樂加吳彥祖樣嘅富二代船P緊，非常搞笑！雖然Bob把口係咁講，但相信Bob享受親子樂多過左擁右抱𡃁模啦。
依家冇得去泳池，小朋友一樣有得玩水！（Bob IG）
除咗游水之外，Bob屋內都有好大嘅空間畀小朋友齊齊做運動。日前佢幾個小朋友就喺電視機前面跟住Coffee（林芊妤）做瑜伽，不過唯獨細佬就係一邊冷眼旁觀，Bob留言：「細佬心諗：『如果有四個真實 Coffee 朝朝喺我面前做瑜伽，我肯定唔會發脾氣、唔會扭計、唔會瀨尿！』」唔少人都講笑話阿Bob係自己私心想欣賞Coffee現場做瑜伽走去屈弟弟。
（Bob IG）
原來Coffee同Bob私下都有啲交情，Bob將佢一家嘅運動相Send畀Coffee，令到佢都忍唔住大讚佢5個小肺友一齊做運動嘅畫面好震撼，不過數一數，阿Bob何來5個小朋友呢？原來Coffee以為Bob嫂係Bob嘅囡囡，多仔公Bob真係生到連朋友都亂埋呀！不過都有人讚係因為Bob嫂做運動日子有功，Slim到同之前身形唔同咗，先至令到Coffee搞亂咗咁話。
（Coffee IG）
Coffee都育有一個囝囝，唔知Bob屋企咁溫馨有冇令佢想追多幾個呢？
撰文：黃蘊姿