組「抗疫」期間限定隊伍 張繼聰望早日散Band

張繼聰、白只與朱栢康昨日以組合「輕勾」身份，到商台接受鄭裕玲節目《口水多過浪花》訪問。因新冠肺炎疫情，激發他們組隊拍片，並希望帶給港人歡樂。至於組合「壽命」長短，視乎疫情何時完結，他們坦言很期待組合解散，代表疫情正式消失。

張繼聰昨日笑言組成「輕勾」的來由，是有感疫情期間大家都留在家中，所以希望拍攝不同影片放上網，逗港人開心。張繼聰說：「其實我哋希望可以盡快收檔，因為代表疫情已經完結。呢個組合拍攝嘅短片都深受歡迎，網民反應相當熱烈。呢個活動開始咗幾個月，除咗我哋三個拍片之外，亦邀請咗電影圈嘅朋友幫手，大家都會拍啲搞笑嘅嘢放上網。」

張繼聰表示希望短片能夠鼓勵大家：「我哋為呢件事嘅製作好認真，諗咗好多嘢去迎合市場，之前推出一段三秒嘅歌曲都好受歡迎。」如果疫情過後，觀眾不想「輕勾」解散怎麼辦？朱栢康說：「到時只可以網上重溫咋，不過又唔好講到咁死，或者再睇下大家有無期！」

唔肯出賣謝安琪

「輕勾」三人都有出錢製作短片，後日的直播亦將增設「課金」制度，與網民互動。張繼聰說：「金額好低，都係五蚊、十蚊咁，我哋到時會有小道具，觀眾可透過課金，表達對我哋嘅愛恨。課金唔係袋落我哋個袋，如果反應好，可能會做啲爆破嘅事，如即場玩反應彈。」他們又指課金額扣除成本，會捐出做慈善。

會否安排太太謝安琪一齊玩課金互動環節？張繼聰笑說：「盡量都唔會出賣屋企人。」擔心另一半到時課金懲罰？他們笑言「怕怕」：「可能一班人夾錢200蚊，已經可以玩死我哋。」白只亦笑言不會安排女友顏卓靈上節目，頂多只會叫身邊朋友捧場。

採訪︰Pauline

攝影︰林良明

編輯：李潔盈

美術：梁政敏