十年後，疫境中觀《世紀戰疫》

留家抗疫的日子很漫長，好彩有很多電影和電視劇可以慢慢煲，有些戲甚至有翻睇需要。前幾日再重新睇美國電影《世紀戰疫》（Contagion），睇嘅心情真係今時唔同往日。

2011年上映時票房只屬一般，今時今日竟再度走紅，皆因十年前所拍的情節與今日的現實有不少令人驚訝的相似之處，到底是純屬巧合抑或是編劇和導演先知先覺？電影《世紀戰疫》十年後再度受到影迷關注，編劇斯科特‧伯恩斯亦大吃一驚，他接受《財富》雜誌採訪時話，編寫《世紀戰疫》一片的最初想法，是表明現代社會容易受到這種疫情爆發的衝擊。伯恩斯說，電影《世紀戰疫》和新冠肺炎疫情之間有無相似性並不重要，重要和更有意義的是社會反應、恐懼的傳播以及這種影響的連鎖反應。

完全贊同編劇的講法，正如當時你睇到戲中所有人排隊都買唔到藥，甚至去超市掃日用品等情節，之前只係睇戲咁睇，今時今日簡直完全代入戲中，感受到那份恐懼感。

這套雖是美國片，但令我更投入之處，是將病菌帶去美國的中招者，是在香港同廚師握手時感染了戲中名為「MEV-1」的病毒。這個廚師曾處理過一隻被蝙蝠感染的屠宰豬，於是就這樣人傳人傳到去世界各地。竟然源頭又是蝙蝠！我開始懷疑編劇其實是否外星人所扮？實在可媲美預言家！

因為字數有限，好多好多細節不能盡錄，真的到了今時今日，你我同在這個「疫」境中才會有的共鳴，同埋共震（嚇到騰騰震）……

這套片更有很多我們熟悉的大明星︰Matt Damon、Jude Law、Kate Winslet、Gwyneth Paltrow等等，還有香港藝人何超儀和徐天佑。我強烈推薦大家睇這套「疫」境電影，包你一定有置身其中嘅感受！

（本欄逢周四刊登）