培幼會籌募善款 為柬國貧窮家庭送暖

大家準備緊聖誕禮物嘅同時，有無諗起受助養嘅孩子？黛安聽講國際培幼會（香港）總幹事蕭美娟博士（Kanie），早前就到訪柬埔寨偏遠地區，遇上查美（Cheim）同佢嘅家人。Kanie話，因為缺乏教育同改善生計嘅知識，無論Cheim嘅父母點努力耕作，都無辦法獲得溫飽，佢哋一家幾日嘅食糧僅有2個瓜果同1小袋白米。

想幫助佢哋，培幼會而家正為柬埔寨貧窮家庭籌募捐款，只要捐出600元，就可為柬埔寨貧農家庭送上「生活之籃」；又可透過「助養兒童計劃」每月捐240元，幫助孩子以知識改變命運。大家除咗可以用個人名義送出禮物外，亦都可用親友名義送出禮物，並利用培幼會網站嘅功能，傳送電子心意卡畀親友，或者喺fb同親友分享助人嘅喜悅。

喺溫馨嘅節日中，為有需要嘅人送上一份窩心又能改變生命嘅禮物，黛安已同姊妹約定，一齊出一分力。