日本人氣家品店HÓME CÓORDY 4000呎分店登陸康怡

想為自己嘅小天地增添生活品味，嚟緊星期五（6日）記住要去AEON STYLE康怡喇，黛安收到風，當日係日本人氣家居品牌HÓME CÓORDY首間香港分店正式開業，呢間佔地逾4,000呎嘅HÓME CÓORDY，會提供超過1,600種「簡約風」嘅家品選擇，包括家居收納盒、寢具同毛巾等等，好輕易就可以融入唔同Style嘅家居風格，夠晒經典又唔易過時。

黛安聽公關姊妹講，新張期間仲有多款精選日貨以優惠價發售，包括由日本今治市製造嘅今治高吸水浴巾（99.9元）、羽毛枕（69.9元），仲有僅售899元嘅多功能布藝兩座位梳化床，簡單就能夠將家居煥然一新，享受和風之美，優惠期做到今個月22日咋。

另外，凡係HÓME CÓORDY購物滿300元，就可以用5毫子換購HÓME CÓORDY購物袋一個，畀你盡情開心掃貨。