寵物帶給你正能量

喺呢幾個月要日日發放正能量，真係談何容易，幾滿嘅油都開始耗盡。之前教唱歌的老師，教我用丹田氣運音，我從來都摸不到哪裏是丹田，但現在每當我收到好多新聞片嘅短訊，我的粗口自然從丹田爆發到頭頂，音域之廣，連自己都嚇親。

不過，再係咁朝朝早未講早晨前先講粗口，我驚會有躁狂症，其實應該已經患病。因此我已減少睇新聞。如果有幾日不外出，就盡量唔睇社交媒體或接受短訊，避得一時得一時，避到一刻得一刻，但始終避唔到一世。所以要家中的天使們為我閉關治療，加持能量。我嘅天使們，就係四隻狗、三隻貓同一隻鸚鵡，幫我進行動物輔助療法（Animal-assisted therapy）。

人和動物有一種無形的聯繫。有研究顯示，動物能有效令人體分泌更多「快樂荷爾蒙」物質，包括有安多酚（Endorphin）、多巴胺（Dopamine），兩者均會給人愉快、興奮、放鬆等感覺。日本麻布大學的研究亦發現，人和狗在眼神和觸碰等互動中會分泌出催產素（Oxytocin），使雙方產生信賴感，並建立深厚感情，每當我同狗狗情深款款，佢或者我都會忍唔住錫錫對方，我就會心花怒放。

其實唔單止係同狗狗對望，你同你喜愛嘅人，又或者你用充滿愛嘅眼睛對住BB，佢回贈你燦爛嘅笑容，你即時都感到幸福滿瀉。你有幾耐無發放過呢啲眼光，同你喜愛嘅人交流呢？

如果無，唔緊要，你有圍繞着你的寵物，就可令你不寂寞，兼令你感覺良好並增加幸福感，非常有益。如果未養過動物，可以去試做動物義工。

寵物是人類最好的朋友，給你帶來快樂的同時，也能給你帶來健康，給你帶來樂觀積極的生活態度。如果你未有眼超超嘅人，畀個機會自己同動物眉目傳情啦！

（本欄逢周四刊登）