3D動畫獲國際賽亞軍 港生再度揚威海外

港生再次揚威海外！黛安講緊係有學界「動畫少林寺」之稱嘅順德聯誼總會翁祐中學，校內4名中三學生，包括黃煥然、曾梓林、游智軒、陳奕軒，製作咗一套3D電腦動畫作品《Stain》，佢哋今個月初參加咗美國三藩市華特‧迪士尼國際青少年動畫節大賽，獲得3D動畫國際組別亞軍，係該校連續3年喺呢個比賽中獲獎。

黛安同負責項目嘅導師傾過，原來4位同學仔用咗半年多時間，每星期花近15個鐘喺課堂後做製作，而故事靈感就來自佢哋做家務時嘅親身感受。《Stain》係講述負責清潔嘅機械人以電腦系統偵測碟子污垢，但原來污垢來自機械人眼睛鏡片。當機械人以為完成清潔時，一個意外令佢要重新開始，從而帶出有趣嘅結局。

導師同黛安分享，評審讚動畫《Stain》畫面渲染技術很好，同學仔能簡單咁利用一個場景去描述故事，內容有趣又有創意，結局亦意想不到。難怪可以攞到呢個獎啦。