港鐵新吉祥物「鐵仔」 同大家安全乘車

前晚港鐵喺荃灣車廠同傳媒聚會，黛安有幸受邀出席。席上除咗有港鐵主席馬時亨、新官上任嘅行政總裁金澤培之外，仲有大家好熟悉嘅「基哥」李聖基都有出席。

其實基哥喺今年元旦開始，已經由車務營運總管職位退咗落嚟，前日佢就帶住港鐵新吉祥物「鐵仔」同一眾傳媒行家見面。原來，「鐵仔」造型係參考未來投入服務的市區綫願景列車，今年暑假會推出一連串「安全乘車」及「禮貌乘車」活動，屆時「鐵仔」就會陸續喺各個港鐵車站入面嘅海報同標語中亮相，更會走訪車站同乘客見面。

雖然基哥本人已經榮休，但吉祥物「基哥」未來仲會同「鐵仔」拍住上，大家日後不妨留意下啦。