全新「扭蛋美術館」 發掘生活化藝術品

藝術對好多人嚟講都好難觸摸，但其實可以好生活化！黛安知道深水埗foreforehead最近就以收藏家為對象，邀請咗6個本地藝術單位、共9位藝術家，成立全新概念「扭蛋美術館」，對「扭蛋」重新想像，創作出人人都扭得嘅藝術品！

「扭蛋美術館」由聽日（27日）起舉行，大家到時可以係扭蛋機內扭出一件件獨立嘅藝術品，好似動畫藝術家黃炳，就將一件藝術品解構分拆成100件，再放入扭蛋中。插畫家Furze Chan所繪嘅Hong Kong Birds，就將多隻香港常見雀鳥變成襟章，扭蛋紙亦化身鳥鑑圖卷，非常有特色！