廁所尿味 可用剃鬚膏嚟辟味？【強嫂家務小知識】

大家好！又係我強嫂！唔知大家屋企有幾多個男人呢？嗱！我唔係講衰嘢啊！早排上網見到有個外國師奶因為廁所太大陣尿味，將成個廁所都搽滿晒剃鬚膏，就係為咗辟味！睇到呢度，我真係感同身受！我絕對好明白屋企嗰兩件男嘅痾尿痾到周圍都係嘅感受，真係好臭！

作為入得廚房出得廳堂嘅我，保住個屋企乾乾淨淨絕對係我做人嘅宗旨！我又點可以畀屋企有臭味呢？貪得意拎強哥啲剃鬚膏搽下個廁所，"吱"咗幾下就發現唔對路！一支剃鬚膏都起碼要$35-$40 啦，洗個廁所幾下就冇晒...就算幾辟味都唔work啦！

所以話呢幾時都係識人好過識字啊！即刻諗起我閨蜜Winnie，佢本身就係做家務助理導師， 問佢點樣辟厠所味就最啱啦！Winnie 話可以用棉花沾啲漂白水，鋪係有尿液或者有味嘅地方，再唔係就用熱水溝埋梳打粉同白醋刷下個廁所都得！呢啲方法啊，加加埋埋都唔洗$35-$40啦！

{{hket:inline-image name="keung.jpeg"}}{{/hket:inline-image}}

各位姊妹，如果你用晒老公枝剃鬚膏嚟洗廁所，浪費啲錢又要再買多枝。倒不如用啲天然啲嘅方法去辟味，儲多少少私己錢仲好啦！

(嗚謝資深家務助理導師Winnie Cheung提供資料)

精選健康知識，盡在 Healthy Life 健康男女
https://fb.com/HealthyLifeExpress/