鼻鼾救星係杞子？

又係我強嫂啊！有啲嘢真係好想share吓畀大家，前排我老公強哥鼻鼾嘈到我瞓唔到，嬲嬲哋就試吓老媽子教落用膠紙貼粒杞子喺個鼻樑度，話可以冇咁嘈。嘩！個衰佬真係安靜哂，啲打雷聲冇埋。

不過下下都要用膠紙黐住粒杞子，有時瞓得衰又會甩咗，真係有啲麻煩。真係睇唔過眼要問吓我老友林教授到底有冇其他方法可以舒緩鼻鼾。佢聽完我用杞子痴鼻之後，即刻忍唔住笑我，話冇醫學根據。唉！真係(火羅)爆！

不過到底點解杞子可以舒緩鼻鼾，林教授就話可能係黐住嘅時候鼻孔張開， 唞氣暢順咗。佢仲教我用辛夷花、薄荷葉、白芷同一片當歸自製香包用樽壓一壓，再放落小布袋裡面，放喺床邊臨瞓前壓一壓香包，嗅下氣味已經可以舒緩鼻鼾問題。

問開梗係問埋，話說上星期出咗篇"夜晚食薑如食砒霜"之後，有網民喺Comment 留言問薑醋啲薑算唔算係砒霜，我老友話，薑醋啲薑就唔會食到中毒嘅！雖然煲嘅時候有老薑、雞蛋、豬腳仲有甜醋，但煲咗咁耐所有精華都去哂啲醋度，而食起上嚟舊薑只會較硬同難消化。所以呢，就唔使太過擔心嘅！

既然林教授提過有機會難消化，就咪話我唔送你強嫂食薑醋小貼士啦︰
- 記住唔好臨瞓前食，你唔休息個胃都要休息㗎！
- 最好就瞓前4個鐘食，畀啲時間個胃消化都要啦

哎，今次真係欠林教授1個人情呀！

(嗚謝 中大中西醫結合醫學研究所客座副教授林冠傑 提供資料)