會展30周年 投資$10億革新軟硬件

黛安噚日同香港會議展覽中心（管理）有限公司董事總經理梅李玉霞（Monica）提早食新年飯，一齊送狗迎豬！席間，Monica就話中美貿易戰爆發，令經濟環境變得不明朗，為各行各業帶來不同影響。但佢就對有30年歷史嘅會展好有信心，每次經歷唔同挑戰，都可以迎難而上。

講到舊年剛剛踏入30周年，佢話會以「突破、智創、共享」作為發展策略，將會展嘅軟硬件做到最好，並投資10億元革新，包括全面更新Wi-Fi網絡、安裝智能樓宇自控系統（BMS）、升格保安系統等，「做到一個即時上網加強版，可以快啲，密度高啲，客人亦都可採購更premium嘅服務。」Monica仲話，香港即將邁入5G時代，為咗可以喺政府發牌時，第一時間就行到5G網絡，會展已開始籌備鋪設5G基建工程。聽講會展嘅BMS系統覆蓋面達100萬平方呎，全個工程今年底就全部完成，黛安都替會展高興，成為世界一流嘅展覽場地，而且不斷進步，維持住高水準服務！

繼續出力走塑 鼓勵自備水樽

另外，黛安知道會展喺環保方面亦做咗好多嘢，舊年起會展內所有餐廳同小食亭，已全面停用塑膠飲管同即棄塑膠餐具，就算係自動飲品售賣機都停止賣膠樽裝飲品，更增設咗兩部蒸餾水環保補水站，畀客人自己帶水樽，用八達通就可買到蒸餾水飲啦。仲好鼓勵同事以身作則，就算買外賣飲品時，都唔用紙杯。

會展每年都舉行逾千項活動，Monica話希望透過「走塑」，感染其他客人，一齊為環保出一分力！