愛心燈影譜戀曲 中環海濱「加料」過情人節

旅發局早前喺中環海濱搞嘅「國際燈光藝術展」，叫好又叫座，黛安唔少姊妹都畀晒like讚好。旅發局姊妹仲事先張揚，今日起會全面「加燈」，畀有情人可以迎住海風，歡渡元宵同情人節；展出期到下個月24號。今次新展品一共有15件，當中7件更以「愛與浪漫」為主題，當中本地藝術家創作的「愛的幾何」，用上教堂彩繪玻璃做設計概念，以幾何圖形砌出不同心形圖案，啱晒小情人喺燈下許一個「愛的誓言」。

唔好以為係情人先會啱去，單身朋友都有機會邂逅意中人。本地藝術作品「從現在開始我們就是一分鐘朋友」就通過巧妙設計，令參加者要互相凝視先啟動到「1分鐘」音樂同燈光效果，不妨帶心儀對象去玩一玩、望一望，話唔定從此「觸電」墮入愛河。姊妹仲話，打卡必到嘅添馬公園光影隧道，都會因應主題換上「浪漫粉紅燈」新裝，仲會用走馬燈效果展示心形圖案，自然要畀「心心」。