滙豐社區同樂日 歐鎧淳同小朋友齊玩Rugby

黛安噚日經過銅鑼灣大球場附近，發現好熱鬧，仲見到香港奧運「女飛魚」歐鎧淳（Stephanie）嘅身影。原來係滙豐聯同東華三院舉辦嘅第一屆「滙豐社區同樂日」趁香港國際七人欖球賽，推廣欖球運動！

聽番公關姐妹講，由今日至星期日，會喺銅鑼灣印度遊樂會舉辦「滙豐七人欖球地帶」，現場除咗有賽事直播睇，仲有免費「滙豐欖球體驗」訓練班，畀5至12歲嘅小學生體驗打欖球，仲有「滙豐欖球體驗專區」測試運動技能、面部彩繪攤位、live band兼唱片騎師現場表演，啱晒一家大細參加！聽講玩得叻嘅小朋友，仲有機會贏走精美禮品！

節目豐富 啱一家大細

政務司司長張建宗、香港上海滙豐銀行副主席兼行政總裁王冬勝、滙豐香港區行政總裁施穎茵、東華三院主席王賢誌、東華三院第四副主席暨社服委員會主任委員馬清揚噚日就一齊主持開幕典禮。而Stephanie仲以大使身份出席，又同嚟自東華三院黃士心小學嘅學生一起參加訓練班，大家打成一片。Stephanie話，以前喺香港欖球總會做過公關工作，所以都對Rugby有啲認識，今次就特別開心，因為可以同班小朋友一齊玩。王冬勝都話，見到班年輕人跳fungi dance，如果自己後生40年，都想跳埋一份喎。