蔡瀾蘇美璐聯展 靈巧書法寫出廣東歌詞

聽蔡瀾講飲講食聽得多，但其實佢書法都非常出色！黛安知道，蔡瀾舊年喺北京榮寶齋舉行咗首個書法展後，因反應好，所以特別將書法展搬嚟香港舉行。今次亦係蔡瀾首個喺香港舉行嘅書法展，名為《蔡瀾行草暨蘇美璐插圖展》，除咗展出佢60幅書法作品外，仲會展出佢御用插畫師蘇美璐嘅60幅插畫，展期由今日（28日）起至4月3號喺香港榮寶齋舉行。

黛安噚日出席聯展開幕酒會，見到好多名人嘉賓，星光熠熠，好似倪匡同「紅姑」鍾楚紅；主人家蔡瀾提到今次展覽加入埋蘇美璐嘅作品，佢就話因為自己嘅書法作品係黑白色，加入蘇美璐嘅插畫可令展覽無咁單調。

蔡瀾仲話，今次展覽特登新增咗大家都耳熟能詳嘅經典廣東歌歌詞作品，好似《獅子山下》同《滄海一聲笑》咁，而《滄》更加係因為佢有晚突然諗起霑叔而寫嘅！

今次聯展的作品總值逾200萬，而蔡瀾嘅作品價錢由5,000至20萬蚊不等，蘇美璐嘅插畫就以每幅均一價2萬蚊發售。可以買到名家作品，實在非常難得！