政商猛人雲集 賀恒基偉邦20歲生日

恒基兆業地產集團轄下嘅偉邦物業管理有限公司，上星期喺IFC國金軒大排筵席，慶祝20歲生日，黛安都應邀出席，仲遇到《晴報》社長麥華章（右2）。當晚嘅表演節目非常精采，恒基副主席林高演仲開金口獻唱《My Way》！

恒基執董孫國林（左2）話，20年前恒基主席李兆基同副主席林高演好有誠意咁邀請佢過檔，開創咗呢間物業管理公司，佢講笑話自己只係「奶媽」，多年來要靠一眾同事努力，令公司做出好成績，仲獲得超過500項國際及本地殊榮同認證。

當晚嚟「賀壽」嘅個個都係猛人，好似一眾立法會議員都有出席，其中石禮謙仲即席獻唱《What a wonderful world》，佢仲拉埋謝偉俊、林健鋒一起唱，盧偉國仲吹色士風伴奏。平時睇佢地議政論政機會多，但原來個個都身懷18般武藝，黛安都大開眼界！