新世界×著名建築師 尖沙咀睇住海景焗桑拿

創新嘅建築設計確實會為城市帶來活力。黛安都好鍾意特色設計，噚日聽公關姐妹講，新世界執行副主席兼總經理鄭志剛（Adrian）今年成立嘅非牟利機構Culture For Tomorrow（CFT），會喺下個月8號至13號，假尖沙咀文化中心露天廣場舉行頭炮活動「沐熱乘涼Hot is Cool」，到時候大家可以睇住維港海景焗桑拿！

大家無睇錯，係焗桑拿！姐妹話，項目係由著名芬蘭建築師維爾‧哈拉（Ville Hara）同香港建築師蕭國健一齊設計，想將芬蘭好流行嘅桑拿，同香港郊區成日見嘅涼亭來個crossover！今日起可以喺http://www.culturefortomorrow.org網上預約定幾時焗桑拿，時段係早上10點至中午12點或1點，最多可以焗20分鐘，每次6個人一組。姐妹提醒，參加人士入去時唔可以着鞋，記得帶定輕便嘅運動衫同毛巾，而出面會準備埋changing room畀大家。好貼心啊！

黛安就好欣賞呢個設計，唔止係一個art work，仲可以畀大家用到！姐妹話，其實Adrian成立呢個平台，就係想畀一班本地嘅年輕設計師及建築師機會，將佢地平日覺得無辦法實現嘅新奇獨特idea成真，仲可以好貼地咁帶入去社區，畀用家可以真正感受喺創新設計同建築新思維下嘅生活文化。

CFT仲特別同香港知專設計學院合作舉辦建築設計比賽，由建築設計及園境建築高級文憑課程嘅學生同畢業生，重新改寫涼亭嘅用途，最後有2人勝出，得獎作品會同期展出之外，仲獲贊助去芬蘭交流同考察。黛安已經約埋咗班姐妹去親身體驗啦，你仲等？