7-Eleven推人氣零食 日本熱賣 直送香港

無論係返工OT要買宵夜，定係三五知己打機要買零食，梗有一間喺左近嘅7-Eleven（7-11）幾時都滿足到大家嘅需要。

噚日7-Eleven嘅公關姐妹Christine就請咗黛安去茶會，率先試食16款由日本直送到港嘅7-SIGNATURE零食。估唔到OL最愛嘅朱古力口味零食，都有成7款咁多，好似法式朱古力脆、雙重果仁朱古力、朱古力夾心餅乾等；連佐酒最惹味嘅海帶根同脆酸梅粒都有，真係大人同細路都照顧得到。

軟雪糕店將擴至70間

黛安就最鍾意食醬油味粒粒點心麵，貪佢細細粒夠方便，一啖尋回童年回憶，又唔會整污糟keyboard。等7-SIGNATURE今個月陸續係各分店登場後，黛安一定要大量入貨。

有好嘢食，梗係要多謝幕後功臣啦。同7-Eleven採購總監（Peggy）傾開，先知採購唔係想像中咁容易，除咗價錢，仲要兼顧入口條例等難關。

至於嚟緊7-Eleven仲有乜新驚喜，Peggy就事先張揚話日本勁Hit嘅松茸味合味道杯麵，香港好快有得賣！不過日本貨源都好緊張，Peggy話搶番來嘅數量都有限，記住見到即刻買！如果試咗今次唔夠喉，7-SIGNATURE第二波將會喺出年登場！

7-Eleven營銷及市務部董事李綺雯（Elman）都話，嚟緊想將販售軟雪糕系列嘅分店，由7間變到70間，等大家易啲開心食。