10月Tap住美食走 大歎即溶芝士通 黑松露三文治

所謂食慾之秋，呢個季節最緊要日日有食神。黛安昨日就同旅發局公關姐妹搶先試勻會喺美酒佳餚巡禮嘅「拍住賞」食飽里登場美食，大大話話成十幾款菜式，同以前飲美酒只能食薯條不能同日而語；公關姐妹仲話終於為「佳餚」搶番一席位咁話。

講到最推介，當然唔少得Porterhouse的極濃芝士通心粉，用上意大利帕爾馬芝士、美國煙熏車打芝士同Velveeta Cheese，臨上碟前大廚Angelo Vecchio仲特登烘到法國即烤芝士半溶，切片落碟，視覺同香味都攞滿分！每次烘芝士工序都要成2分鐘，供應勢必有限，記住mark實。

想light啲，揀Cassio的Bikini三文治最啱，一咬開黑松露香味就湧入鼻尖，配埋咬口十足嘅夏南瓜同滑一滑嘅西班牙乳酪，再飲啖白酒就天衣無縫。想食大大啖海鮮，Picada的大蝦串就最滿足到你，80蚊就有3串，啱晒同知己開心share。

中菜代表都好厲害，Chilli Fagara大廚陳啟英特登將「辣爆」的紅油抄手，調配至「暗暗辣、好好味」，首日限量50份咋。73歲嘅佢仲笑言，keep得住好身材都靠食辣，仲話已調好秘製醬汁同指天椒，想即時加辣都無問題。