《春嬌救志明》救埋彭浩翔

楊千嬅的《春嬌救志明》開畫以來日日大收旺場，近期睇電視，黃金時段有陳松伶加宣萱，忽然間「中女」當道，個個有牙力、有實力，加上題材貼地，港女對麵包與愛情如何取捨？又如何共存？可謂合晒港人胃口。

作為《春嬌》系列第三集，志明同春嬌一齊走過八年，感情路上經歷風風雨雨，再唔結婚隨時合久必分。「姊弟戀」的感情可能更加脆弱，想結婚、想生仔，但又怕愛郎永遠長不大。從前說屋企有個大細路，就是指老婆嫌老公唔夠成熟。

彭浩翔導演近年北上發展，《春嬌2》是香港人在北京的故事，《撒嬌女人最好命》更讓港人覺得離地，觀眾最懷念的仍是《低俗喜劇》。不過導演出名轉數快，正如一位金牌大廚，想辦法把冰鮮雞當成新鮮活雞去煮，只要手勢好，未必個個食得出。其實今集《春嬌》一樣有內地資金，但憑編劇的調味、導演的章法，再加上宣傳人員的包裝，就是找對了港人喜歡的口味。笑料足、人情味濃，同哭同笑，成就出完美三部曲。究竟是春嬌救志明？還是志明救春嬌？其實只是觀點與角度問題。