屯門免費驗乙肝

有個住喺屯門嘅朋友同我講，上星期喺屯門仁愛堂開咗間「仁愛堂程思遠世代無肝炎中心」，免費幫市民驗乙型肝炎。佢話只要篤一篤手指驗血，15分鐘就知道自己係咪帶菌者，測試快而準。

開頭以為患乙型肝炎係小事，原來病情潛伏一段時間，就有機會演變成肝硬化或者肝癌！所以朋友叫我有時間都去驗下。呢個中心嘅發起人係羅文以前嘅主診醫生廖家傑教授，佢十幾年嚟致力推行一個叫「世代無肝炎」嘅計劃，幫過唔少人驗血。有啲人就係因為接受咗測試，先知自己係帶菌者，立即求醫。

呢個中心雖然喺屯門，不過規模一啲都唔細！中心內嘅測試員都接受過專業訓練，而且仲有幾位專業嘅肝臟科醫生嚟做義診同埋講座，中心仲會為有需要治療嘅人士提供轉介同跟進服務，連世界肝炎聯盟嘅主席Charles Gore都專程飛嚟香港參觀同支持。

呢個檢查既方便又免費，冇打過防疫針嘅朋友，不妨打電話去預約，求個心安。電話：2655 7885。

(本欄逢周五刊登)