禁奶粉廣告？

衞生署近日正就規管奶粉及嬰幼兒食品銷售及守則諮詢公眾。有諮詢係好事，不過看細節呢，就覺得奇怪，如自願守則中建議，禁賣三歲或以下嘅奶粉產品廣告，原因係奶粉產品嘅銷售方式過於進取，導致本港母乳餵哺率偏低。唔畀賣廣告，就可以推廣母乳？呢個諗法係咪太天真、太傻？

無疑奶粉廣告確有誇張成分，例如話BB食咗奶粉中含嘅DHA、AA就會變神童之類，不過誇張嘅豈止係呢種廣告？你話搽完面霜可唔可以hold住十年青春？信唔信喺香港幾百萬可以買到「宮殿式」豪宅？若廣告過於誇張，相信市民自會作出判斷。

香港係自由市場，產品推廣同資訊嘅流通理應百花齊放，如果廣告內容失實，就要對之規管，而非「一刀切」禁播廣告。政府應多想方法宣傳母乳餵哺，而非以為針對奶粉推廣就係做咗嘢。

母愛偉大，媽媽絕對會不惜一切，令孩子有最好嘅成長，但香港在職婦女多，有幾多媽媽完全可用母乳餵哺孩子至三歲？奶粉未必係媽媽嘅最好選擇，但應該有多啲渠道畀佢哋知同有得揀。

(本欄逢周五刊登)