金耀基八十書法展 董建華劉遵義齊到賀

近年重新興起寫書法，黛安噚日就去見識咗中大前校長金耀基嘅首次個人書法展，每筆每字都好「治癒」。

香港人做嘢咁忙，可以透過寫書法或者畫畫，畀1至2小時自己沉澱，都係一件樂事。書法展取名「金耀基八十」，正正係因為現場所有作品都係金校長80歲後寫成的，總共有76幅作品。佢話，細個由父親督促去寫字，但到退休前都無再用毛筆寫字，要喺退休之後先重新執筆，每星期寫1、2次，每次仲會寫上6、7小時。真係非常專注啊！

佢仲話，父親就係佢嘅啓蒙老師，成日同佢講讀書重要，但寫字就更重要，「字如人之面目，必須用心去寫。」所以今次展覽除咗係佢嘅回顧外，亦係佢對父親嘅追憶。

金校長已年過80，但筆法剛勁有力，聽講就連藝術評論家侯軍都讚佢筆墨「中鋒行筆，骨力剛勁，神采畢現」，有「金體文」之稱。

噚日係書法展嘅開幕儀式，主禮嘉賓星光熠熠，有全國政協副主席董建華、國際知名經濟學家劉遵義教授、同《經濟日報》兼《晴報》社長麥華章等都有出席支持，原來麥社長同金校長好有淵源，因為麥社長係金校長孫女金雨靉（Audrey）嘅契爺呢！