排1個鐘入場都值得！ 時代廣場免費睇畢加索

黛安噚日經過銅鑼灣時代廣場，天寒地凍見到數百人排長龍，原來係等睇「畢加索與積琪蓮」畫展，估計要排成個鐘先入場參觀到。呢個展覽真係好巴閉，全部作品都係第一次喺西班牙以外展出，包括巴塞隆拿畢加索美術館鎮館之寶《宮女》系列之一的《積琪蓮》，顧名思義，這位就係立體主義大師畢加索第二任妻子Jacqueline Roque。

第二任妻子做model

睇藝術品之前，梗係要了解下作家嘅背景。話說畢加索一生嘅創作都同女人有關，而佢既後半生幾乎都喺度畫Jacqueline，單係1962年，就畫咗70多幅，可想而知佢對畢加索有幾重要。黛安仲知道，二人自50年代開始廝守，Jacqueline陪伴畢加索共度餘生，直到去世，真係好浪漫。

今次嘅展覽，係時代廣場同巴塞隆拿畢加索美術館合作，共有13幅Jacqueline肖像畫作，其中《積琪蓮》就係1957年連同《宮女》系列的58幅畫作一同完成，直至1968年捐贈予由去世好友沙巴德斯所管理嘅巴塞隆拿畢加索美術館，距今已經有逾半世紀歷史。另外一幅廣為人認識嘅代表作就係《戴帽拿着絨球和印刷罩衫的女人肖像》，畢加索用咗2個月以版畫製作，顏色鮮豔，望多兩眼都值回票價啊！

港人都好有文化氣色，噚日就有唔少市民專程來睇，睇完仲大讚「好有味道」！