$138入場 Taste of Hong Kong 3月中環平歎米芝蓮

第二屆Taste of Hong Kong又嚟喇！3月16至19日一連4日喺中環海濱活動空間舉行，香港貴為「美食天堂」，舉行年度美食盛事當然唔會馬虎，黛安聽聞活動規模比舊年擴大四分一，參與的餐廳和業界陣容鼎盛，包括頂級調酒師及超過20位本地餐飲界頂尖大廚呀！仲有一系列娛樂表演節目，相信大家可享受到獨一無二的戶外餐飲體驗。

活動入場費由138蚊起，大家入到去之後，只需用50蚊起的價錢，就可在場內品嘗知名米芝蓮餐廳Amber或都爹利會館等的招牌菜；而城中頂級名廚亦會炮製場內限定的食物，如來自巴黎米芝蓮二星餐廳Kei Restaurant的日本大廚Kei Kobayashi。

廚房裏的畢加索

原來Kobayashi的菜式不但色彩繽紛，而且注重擺碟，贏得「廚房裏的畢加索」的美譽，今次係佢第一次參加Taste of Hong Kong，佢話好期待同香港大廚會面同交流心得。Kobayashi仲透露，會喺場內呈上限定創作，主要用薯糰、巴馬臣芝士、西班牙火腿薄片及黑松露製成，係巴黎人在黑松露當造季節必享的佳餚，淨係聽都已經流晒口水喇！

另一位來自紐約人氣餐廳Shuko的新晉大廚及老闆Nick Kim，亦由美國遠道而來，同樣會喺美食節現場表演精湛廚藝，同大家分享佢烹飪的心路歷程，記住唔好錯過喇！