中信銀行推新卡 用人仔消費賺Asia Miles

好多香港人都鍾意四圍去旅行，其實只要識得精明儲里數，咁就慳番唔少機票錢！前排黛安先至換咗兩張機票，打算遲下同honey飛去北海道滑雪，睇返航空公司網站，香港直航北海道機票每張5,000幾蚊，黛安咁就慳咗一萬蚊啦，真開心呢。

兌換里數總額升1成

昨日喺一個活動見到亞洲萬里通（Asia Miles）CEO黃思遠（Stephen），講起兌換miles嘅事，佢亦同黛安分享，雖然今年經濟市道「麻麻」，旅客減少咗坐商務同頭等客位，令到以飛行來賺取里數嘅總額減少，不過，唔少人就轉為透過信用卡消費、餐飲和網上訂酒店來賺取里數。據講今年9月同舊年同期比較，市民兌換里數總額按年升咗1成，證明香港人都好識精明消費。

另外，Stephen亦講到內地旅客消費強勁，所以昨日聯同中信銀行及國泰航空合作，一齊推出兩款「中信國泰航空聯名信用卡」及「中信亞洲萬里通聯名信用卡」，主攻內地市場，專為國際商務出行、熱愛旅遊和享受生活人士而設。

至於點樣賺里數呢？黛安已經幫手問咗公關，佢話白金卡持卡人，每消費10蚊人民幣就可兌換一里，金卡則要15蚊人民幣兌換一里喎。