項明生孖住陶傑 坐郵輪去德國

黛安平時最鍾意睇旅遊節目，昨日同旅遊達人項明生（James）食飯，佢話畀黛安聽，之前同才子陶傑坐River Cruise水晶號去咗德國、奧地利、斯洛伐克同匈牙利去旅行。以為佢哋咁梳乎去歎世界啦，原來係為咗拍旅遊特輯咋！

問阿James有無食好嘢，佢笑住話去到漢堡一定要食漢堡包啦，索價百幾蚊一個包，但味道都比唔上香港十幾蚊嘅漢堡喎。講到最深刻，就係去德國參觀造船廠，佢話當地船業咁出名，全因船匠對工藝嘅追求，就好似今個星期六香港首航嘅星夢郵輪，3,000幾間房都是在別處建造，造好才送到船塢組裝，技術唔夠嘅話好易漏水，稍有偏差仲會嚴重到螺絲都上唔到。星夢郵輪總裁Thatcher Brown說，今個星期六當郵輪首航香港，停泊在啟德至晚上8時會有「神秘活動」喎，大家要密切留意。

聽阿James講，當年中日甲午戰爭過後，晚清朝臣李鴻章都有去德國參觀，並拜訪德國「鐵血首相」俾斯麥嘅故居。咁啱得咁蹺，James到訪時，當地嘅俾斯麥博物館正舉行李鴻章嘅展覽，令佢得以在遠方睇到李鴻章嘅手稿。想知道佢哋嘅旅程有咩趣事，今個星期六晚八點可留意無綫J5佢哋嘅旅遊特輯《德國誕生》啦。