方健儀 連詩雅 雨中跑入迪士尼

去香港迪士尼玩就玩得多喇，有冇試過跑步呢？迪士尼喺剛過去嘅周末，首次舉行園內跑步活動，包括10公里和5公里賽事，仲有3公里親子跑及兒童短跑，反應非常好，差唔多有9,000人報名參加！雖然周末落大雨，不過一眾靚女明星，包括連詩雅、鄭融、「仙氣」主播方健儀，以及帶埋囝囝、囡囡一齊參賽嘅朱凱婷同朱薰，都無懼濕身堅持跑落去，真係好有體育精神！

至於贏得10公里賽冠軍之一嘅本港長跑好手紀嘉文就話，沿途遇唔少迪士尼朋友，好似丁滿、勞蘇、胡迪及翠絲、巴斯光年等好落力幫佢哋打氣，查實佢心底裏好想停低同佢哋「集郵」，但因為今次比賽成績會列入香港紀錄，佢只好「忍痛」繼續跑喎。

今次最受歡迎係3公里項目；而參加5公里同10公里賽嘅健兒，就可穿梭於七大主題園區。可惜黛安太遲知，如果唔係都想入迪士尼跑埋一份。獲得10公里賽中4個組別的首三名參加者，都可以得到迪士尼好萊塢酒店1晚住宿或酒店自助午或晚餐做禮物，一於跑完喺樂園順便慶祝同休息，一舉兩得呀！