零食物語工作坊 杯麵DIY 包裝印嘜頭

噚日收到驚喜，一打開巨型甘大滋盒有兩個杯麵，最搞笑係杯麵印咗自己個樣。原來公關老友好有心思，特登用呢個方法同大家介紹，零食物語最新搞作——全港首個創意工作坊Foodfie煮播室正式啟動。

以後去灣仔利東街嘅Okashi Galleria X Calbee+，唔止可以掃貨同食即炸薯片，上二樓嘅「煮播室」，有得學整巨型甘大滋、焗曲奇、DIY杯麵等，仲可以自拍再將相加落包裝，即係每個人嘅製成品都唔一樣，夠晒特別！

公關話，Celine妹妹（楊鎧凝）率先參加工作坊，好似整杯麵，首先喺自拍專區影相再揀埋心水圖案，之後喺「巨型轉動食物機」揀自己鍾意嘅麵餅、調味料同配料，貼埋包裝貼紙就搞掂晒！聽講除咗杯麵，大家仲可以改為放煻果，例如棉花糖等，總之任你揀。Celine都有試烘焙創意坊，整巨型甘大滋同曲奇，自己將麵團搓成長條形再焗，焗完加朱古力漿同其他裝飾，都要畀啲心思先整到咁靚嘅甘大滋。如果想親子同樂，1個大人加1個小朋友參加只係$335。