東華 x OK便利店 推$38「待用曲奇」

好快就係母親節，東華三院旗下iBakery同OK便利店合作推「母親節待用曲奇」，等大家趁節日來臨，將愛心分享出去。今日開始到5月11日，市民去任何一間OK便利店，選購價值$38「母親節待用曲奇」，不過畀完錢無曲奇畀你，因為iBakery烘焙團隊，會透過東華三院社會服務網絡，將玫瑰花曲奇禮品包，轉送畀低收入家庭同單親家庭，等佢哋都感受到呢份溫暖。

今次玫瑰花曲奇係iBakery特別製作嘅特別版，用咗法國小玫瑰，食落有啖啖花香，幕後製作團隊應記一功。講起iBakery，大家可能未必知道，佢哋係東華三院屬下專門訓練及聘用殘疾人士嘅社企，2010年成立到依家，已經有8間分店、超過70位僱員，當中過半數係殘疾人士。為咗答謝市民熱心支持，買三包或以上「母親節待用曲奇」，憑收據去任何一間iBakery分店買曲奇或麵包會有折扣，詳情可瀏覽iBakery Facebook專頁。