ViuTV明開台 節目預告《We I U》率先睇

今年愚人節，跟以往有點不一樣。不少朋友說，除了追憶哥哥張國榮，4月1日晚上，難得安坐電視機前，收看了無綫劇集《愛‧回家》大結局，再靜候亞視「熄機」一刻。沒有看到預期那張「告別卡」，望着一片雪花，感覺或喜或悲。不過，時間巨輪不會停下，正如首屆亞姐冠軍黎燕珊接受傳媒訪問時說，「要向前看」。

4月2日凌晨，告別過去後，大家按下遙控menu設定，再按「自動搜台」，好快見到電視史的新一頁——出現99台ViuTV的logo，原本以為只會睇到Facebook上傳過的宣傳片，估唔到聽日先正式開台，宣傳片都好有睇頭！節目預告《We I U》搵嚟一班型男美女扮演ViuTV幕後團隊，好似曾拍攝美心廣告的Angela袁澧林飾演創作組撰稿員。透過佢哋向老細sell蹺過程，介紹ViuTV開台節目，預告片熱傳嘅《跟住矛盾去旅行》、女子MMA《G-1格鬥會》等，預告都咁畀心機，出街節目更加唔使講。

畀心機全因想打好呢場仗，同ViuTV台長魯庭暉（Lofai）食飯時，佢都講過：「感覺肩負歷史使命」。Lofai坦言，面對互聯網世界，以後很難有機會再維持一台獨大，更可能是「做大嗰餅」，吸引更多觀眾回到電視機前。看看ViuTV節目表就明白他的意思，同一時段不會是同一類節目，用外購王牌韓劇、實況娛樂節目吸引不同觀眾。