幪面超人駕臨《晴報》

「嘩！幪面超人嚟啦！」伴隨不少港人成長的幪面超人，今年已經45歲喇，其中兩位幪面超人V3及Super1噚日chok住上嚟《晴報》探班，擺晒post好型呀，仲帶埋幪面超人咕臣、T-shirt、帽等精品，搞到成班同事興奮起哄，爭住影相！

原來明天開始至10月31日，屯門市廣場將舉行日本鬼才漫畫家石之森章太郎《幪面超人45周年特典店暨展覽館》，除咗展出歷代幪面超人經典造型、最新日本限定精品外，仲首次喺香港展出石之森章太郎嘅手稿複印版，欣賞價值極高！現場仲有限定版幪面超人古迦（KUUGA）及555（FAIZ）搪膠公仔，聽講係第一次喺香港發售，每款只限量150套，粉絲真係唔可以錯過！