王耀祖事隔五年再次重演舞台劇《会社人間》，出演廿歲出頭初出茅廬的辦公室年輕人。幾乎從未在辦公室工作過，他坦言享受斜槓族的生活，任監製、司儀和YouTube頻道的工作，正正是支持著他的演員夢想。每個崗位視為全職工作，難免偶爾分身不暇累到崩潰，王耀祖坦言有過想放棄的念頭，但抓緊信念向前走，沿路風光絕對是獲益良多。
田豪祖3寶丨王耀祖歐遊返港入境程序一肚氣 外傭姐姐花6小時才到達隔離酒店【下一頁】
《会社人間》今次重演，王耀祖笑稱演廿幾歲是一大挑戰，不過角色定位跟五年前大不同，他認為2024年的大學畢業生思想跟他當年大為不同，希望將新方法加入角色，為觀眾帶來更大的共鳴。跟劇中的打工仔不一樣，王耀祖享受做「斜槓族」，「我人生有四個最大崗位，YouTube頻道、演員、監製，仲有係活動司儀，頭三樣我都視為一份全職工作咁做，不過你要我揀，我一定做演員，絕對係我最愛嘅一件事，但只係做演員會好窮呀喎！仲記得第一日入演藝學院讀書，老師已經同我哋講演員呢行飽和呀喇，所以你要做就做最好嗰個，咁當然從來冇最好，所以我知一定要好努力。」
後來獲邀為有線電視做主持，讓王耀祖正式展開「斜槓族」的生活，手持飯票去繼續追夢，他感恩早就成為斜槓族，但無法掩飾的是多重身分難免會累透身心。「好幸運亦好滿足，我搵過楊天命師傅，佢話我一切都好順利，我同師傅講好攰，但我揀唔到放棄邊樣，我問可唔可以揀做少啲，佢話唔可以，好啦！咁我認命啦！」王耀祖追求完美的性格，令三份工作的擔子扛在肩上，一路走來都不容易，他承認絕對有考慮過放棄「田豪祖3寶」Channel工作，「唔止一刻添，我有同兩位拍檔貴花田同曾志豪講過，因為我哋之間好坦白，舊年5月做完《愛我別走》，真係有少少頂唔順，我好攰冇時間，我好想做監製策劃一個自己想做嘅戲，但我連睇劇本嘅時間都冇，所以我心入面唔平衡。我做緊好多嘢，全部都係鍾意，只係擔子可能好重，好努力喺YouTube為人大家提供歡樂，做演員同監製分享好劇、好東西，但有時我只係想打場牌啫，點解都覺得咁奢侈？心乜都有諗過，我想放半年假乜都唔做，但唔得囉，因為有責任喺身，我就咁掉低所有嘢唔理兩個拍檔，我都唔會過到自己，所以同佢哋呻完，好啦又係新一日可以繼續。」
工作上的疲倦或者睡醒一覺可以減卻，但一向表面樂觀的王耀祖面對壓力時，總往心裡面吞。早前發生藝發局停止資助舉辦舞台劇頒獎禮事件，他坦言壓力爆標，但壞習慣總是報喜不報憂，「連續好幾日港聞記者搵我回應，我講說話一向都好流利，但我真係唔識答，腦入面只係諗住個後果，撞啱嗰幾日YouTube要開咪，我又排緊戲，再加上家人喺外國返嚟要陪佢哋玩，繼續保持住個笑樣，直至有一晚我安排佢哋去玩，然後自己返屋企攬住隻狗喊。」幸好後來香港戲劇協會會長馮祿德發言，他亦以對方的發言為依歸，不再補充回應。
三寶分港台泰直播丨王耀祖成功繞道飛泰國度假歎世界 留港抗疫疲勞：不如大家都飛啦【下一頁】
好拍檔貴花田和曾志豪對王耀祖而言是一個陪伴的角色，「我哋唔會一齊攬住喊嗰種，只係簡單表達：『唔使擔心，我喺度！』（掛住豪仔？）唔會掛住佢啦，一星期網上見足五日，我哋以前真係成日鬧交，我成世人最憎人遲到同賴皮，佢就完完全全係呢種人，不過大家相處咁多年已經習慣，呢一年真係冇乜點嗌交，大家都大個，明白對方出發點都係善良，有距離但唔掛住佢，香港人好適應呢種這麼近那麼遠嘅關係。」
演出詳情：
編劇、作曲、作詞：鄭君熾
藝術總監、編舞：Mohamed Drissi
音樂總監、編曲：羅健邦
導演：王俊豪
歌唱指導：何朗幏
佈景及服裝設計： 孫詠君
燈光設計：羅兆鏵
音響設計：夏恩蓓
演員：王耀祖、張紋嘉、馬沛詩、邢灝、劉亭君、黃安婷、邱萬城、鄧栢聰、黃安妮、黃溥然、郭巧明
日期：23-24.2.2024 (星期五至六 Fri-Sat) 8pm 25.2.2024 (星期日 Sun) 3pm
地點：葵青劇院演藝廳
票價：$380 / $280 / $200 門票現已於 Art-mate 公開發售 設有六十歲或以上高齡人士、殘疾人士及看護人、全日制學生及綜合社會保障援助受惠 人士優惠 （優惠先到先得，額滿即止）
節目查詢 2291 6357 / hk3ami@gmail.com
網頁 http://www.hk3ami.com
FB: hk3ami
IG: hk3ami2018
立刻加入《晴報》WhatsApp頻道，獲取最新娛樂、健康及著數資訊，仲有送禮活動！
【https://bit.ly/3RnCHkV】
U Lifestyle App睇盡《晴報》新聞資訊及自家節目 ↓
↓↓同步更新、更快更順↓↓
【免費下載】
攝影：何家賢
撰文：楊安莉