林超榮癌逝丨陳淑蘭憶好友離世前屈穎妍一席話 「超人」女兒親筆信揭爸爸遺願

香港電影著名編劇及演員林超榮（超人）日前病逝，終年61歲。一起主持港台節目《開心日報》的好友陳淑蘭（蘭子）亦有到醫院送他最後一程，蘭子於本報專欄撰寫悼念信予超人，寄予思念。

同場加映： 新聞女王丨佘詩曼放慢腳步享受演戲兼陪家人 自嘲頭髮天然攣每晚必做一件事

{{hket:ul-video id="9751"}}{{/hket:ul-video}}

蘭子親筆信內容如下：

「親愛的超人，當我兩次進入加護病房（ICU），在你旁邊看著你的時候，除了心痛和傷心，最大的感受竟然是悲憤！為甚麼這場仗你會被怪獸打輸？我真的很憤怒！我一直與你傳信息，你總帶著樂觀及正能量的心情跟我說你會相安無事，我亦跟你說好人有好報，吉人一定會有天相，你再跟我說：『100分全對，吉人自有天相，超人自有天相，四圍吸收正能量！』任何時候，你都可以拋些笑話出來，我對你的康復充滿信心！約定你等我北京回來後，親自過來跟你打氣，誰知...

為甚麼情況會突然急劇轉變成這樣？

我在醫院抱著呀屈（屈穎妍）時，佢跟我說，女兒問她：『點解爸爸咁好人，個天要咁對佢？』呀屈說她不知道如何回答女兒。其實我都好想知道原因，你是你女兒們心目中的SUPER DADDY! 你是呀屈的SUPER HUSBAND! 你是你媽媽心目中的SUPER孝順仔。你對人真心又沒有機心，而且超有愛心，如此年紀卻仍有著童真，所以你身邊每個朋友都這麼喜歡你，在娛樂圈可以有這麼多真心朋友，確實不簡單，你是『真超人』！正如你講，你要四圍吸收正能量，是否因為這樣，你要暫時離開地球，飛去宇宙吸收更大的正能量呢？

不少人說我和你是神經俠侶，兩把神經刀放在一起，一興奮就不受控，當人人都感無奈時，只有我倆不斷低能地大笑！超人，我好想念這些歡樂時光啊！

還有一個歡樂時光，就是做節目時，你分享你吃了一條好珍貴又美味的魚叫『忘不了』，我就說不能獨食！我都要你請我食『不了情』，結果我又擺烏龍叫錯名了，但跟你的互動讓大家笑到肚痛！

超人，好多謝你給了我這麼多「忘不了」的開心回憶！再見啦，好拍擋！」

{{hket:inline-image name="3.jpeg"}}{{/hket:inline-image}}

《開心日報》播出《懷念林超榮特輯》，蘭子、杜雯惠、黃桂林、譚永標等輪流講出對超人的感受，蘭子喊住主持說：「我知道超人係同我哋一齊，佢嘅正能量嘅人同我哋一齊。」而譚永標亦泣不成聲，飲泣表示自己後悔從未告訴林超榮自己何其欣賞他，甚至視他為偶像。黃桂林又透露，這天早上特地買了超人最愛的多士、雞蛋，放在他平時最愛坐的位置。節目上除了播出他最後一次參與廣播劇的片段，亦播放多首超人喜愛的歌曲，如李宗盛《寂寞難耐》，以及她三個愛女特地點名要送給爸爸的《一生所愛》（原唱：盧冠廷）。

蘭子強忍眼淚讀出超人三個女兒撰寫的親筆信，當中女兒更透露林超榮遺願。以下為林超榮女兒親筆信全文：

「超人爸爸嘅傳奇人生昨日煞青咗，我好鍾意亦好唔捨得呢個唔梳頭、得返四隻牙、拎住個穿窿紙袋，入面袋住三本書，仲係過期未交罰款，同埋將粗口發揮得淋漓盡致嘅爸爸。爸爸，個個嚟探你嘅朋友都話你真係好好，又搞笑，又遴鬼迍，但係乜人都幫。講到幫人，爸爸都有『有志不得伸』嘅時候。

講個秘密畀大家聽，爸爸其實一直都想做區議員，除咗可以幫人之外，仲有個天大契機，就係可以喺嗰區周街免費泊車。喺《開心日報》報道主持離世咁傷心嘅消息， 成件事好有爸爸嘅作風，你乜都睇得咁樂觀。爸爸冇嘢做唔成，唯獨係做唔到嚿電芯，爸爸只有正極，冇心機，正能量爆滿，爸爸係所有人心中嘅開心果。好掛住嗰個10:30電台開工，10點先電話響，再聽多一句『哎呀！』然後牙都唔刷就衝去返工嘅爸爸，我問你，個口咁臭畀人聞到㗎喎，你話是但啦，啲聽眾都聞唔到嘅。冇錯，爸爸真係好污糟，不過幫佢澄清返，爸爸一日沖兩三次涼，一日洗廿幾套衫，只不過都係得一條底褲。爸爸，你咁鍾意講嘢，喺另一個世界記得開返場棟篤笑任你噏，到時開再間書店同文具店，到時大把筆俾你偷，冇人再話你用鋼漏墨漏到隻手變黑色喇。爸爸生前真係好鍾意筆，見筆就攞，前日已經得到朋友馬小強證實，爸爸確實有『戀筆癖』，爸爸對筆嘅喜愛程度，大至動作全伊利沙伯醫療團隊為已經住院嘅爸爸喺舊病房找尋失物鉛筆一支，當中具有誇大成份，請自行斟酌。

爸爸，你喺滂沱大雨中都不忘拯救一竇BB貓，唔知係咪因為佢哋喺你書店大，成日𥄫你做緊啲乜嘢，而家又畀我哋叫做肥仔，又係隻污糟貓。一切嚟得太急啦，最後一句聽爸爸你講嘅竟然係『嘩！梅菜剁豬肉，正呀！』邊有人做化療都咁有胃口㗎？爸爸，你真係好努力、好叻、好犀利，我哋永遠愛你，你永遠都喺我哋身邊。雖然WhatsApp group嘅訊息以後唔會再全員已讀All seen，但係你對我哋嘅好，對我哋嘅付出，你一生人做過嘅好事，我哋所有人Well received，收到晒，再見啦爸爸。」

圖片來源：Facebook