王喜寸馬浚偉誇大病情冇句真 網民食花生觀戰：咩事咁大仇口？

馬浚偉早前開完六場《幸福 · 春夏秋冬》Ma’s Ter Mic演唱會，並自爆開完頭三場後身體不適，更出現多種嚴重症狀。王喜以「如果我係馬浚偉經理人」為題拍片，讀出相關報道，並句句寸爆、字字有骨，質疑對方講大話。

同場加映： 叠影狙擊｜文頌嫻認唔識撈拒公司命令被罰 「七魔女」變晒慈母唔憂單身佘詩曼

{{hket:ul-video id="9662"}}{{/hket:ul-video}}

馬浚偉演唱會全部結束後，於慶功宴上透露的六場演唱會看似順利，但第三場演唱會時佢開始感冒，聲帶發炎。服藥後出現嚴重的過敏反應，舌頭腫脹至出血，口腔脫皮，第四場開唱時病情最為嚴重。馬浚偉透露當晚自己全身腫，要入醫院，整個嘴、氣管、喉嚨全部發脹，打針消腫都冇用，已經脹到黏膜全部裂開。佢形容情況十分凶險「差啲死」，但因為唔想令觀眾失望選擇硬撐。到第五場演唱會時，嘴巴流住血唱歌，台邊工作人員隨時幫佢擦走吐出嘅血。馬浚偉自豪表示：「台下觀眾完全看不到，我是不是很厲害？」

{{hket:inline-image name="66c89df9gy1hjoqr7f82rj21sc2dsqv5.jpg"}}{{/hket:inline-image}}

王喜讀出報道，再表示「擔心」：「出現咗狀況喎，爭啲冇命呀，哎呀！擔心死我喇！」又寸馬浚偉向傳媒自爆唔舒服：「自爆即係唔係人哋嚟問你啦？即係吸引唔到人哋嚟問你啦，又或者冇人關心，又或者冇嘢值得人關心啦，於是乎先係自爆。」報道中又指今次係「無預警過敏」，王喜就寸爆：「爭啲令佢冇命呀，乜有啲過敏會預先發個Message或者E-mail畀你，話我準備有過敏反應㗎喇，你Ready喎，你Ready未呀？咁我先至開始過敏畀你睇，無預警喎，啲中文真係好好。」王喜指如果報道係完整複述，佢覺得馬浚偉講大話：「一睇已經知係大話啦！當睇嘅人唔知佢講緊大話，當睇嘅人會信喎？」馬浚偉自稱因溫差著涼，王喜調侃：「平時身體行出行入啲地方（冷氣地方）又唔見你發炎嘅？開演唱會就會聲帶發炎嘅？」

王喜又質疑馬浚偉食消炎藥後反而令病情惡化，呼籲佢開記者會、公開涉事藥物：「食消炎藥反而令炎症咁劇烈反應喎，到嘴巴、氣管、喉嚨腫脹到全部黏膜裂開喎，如果有一隻自稱消炎藥嘅藥物，隊咗之後會有咁嘅反應，呢啲唔係叫過敏反應，係叫毒理反應。如果有種消炎藥係會講到有馬生呢種咁嘅反應嘅話，咁係咪應該第一時間同消委會講呀？係咪第一時間開記者會呀？係咪要為咗公眾利益，你要拎嗰隻藥出嚟畀大家睇呀？個名點串法呀？邊個醫生開畀你呀？就算你自己買，邊間藥房會出售呢款會導致所謂過敏反應咁劇烈嘅消炎藥呢？你覺得你好特別咩？幾百萬人當中只有你一個有過敏反應咩？梗係唔係啦，你中得嘅話，阿茂阿壽、甲乙丙丁都會中㗎嘛，你點可以自視咁高㗎？覺得你先係天選之人……」

王喜又指不解馬浚偉不適到如此地步，點解觀眾完全冇發現：「去聽第四、第五、第六場嘅觀眾，係完全察覺唔到之前四日裡面原來馬浚偉徘徊喺死亡邊緣喎，而去到第五個大話就係，喺最嚴重嘅時候，工作人員喺台邊Stand by幫佢止血，因為佢條脷會流血吖嘛。嘩，條脷流血我想問有急救牌嘅每一位，條脷有血點止血呢？係咪應該攞噴霧膠布幫佢止血呢？原來有歌手可以嘴巴、喉嚨腫脹到黏膜全部裂開嘅情況下，繼續好敬業地完成佢演唱會，而台下冇任何觀眾聽得出有問題？答案只有一個，謎底就係——咪嘴呀！哈哈哈，Otherwise，冇可能囉！條脷流血仲可以唱到如夢似醉？」

{{hket:inline-image name="8.JPG"}}{{/hket:inline-image}}

網民睇完片段都好想知到底王喜同馬浚偉「咩事咁大仇口」，王喜都繼續於留言區狙擊馬浚偉：「講真呀，你覺得阿馬生邊句係真嘅呢？」而兩人除咗同樣曾為無綫藝人外，唯一共通點就係同樣係「迷暈黨」。王喜當年於陳志雲上庭時陪伴在側，出入法庭、雪中送炭，兩人近年關係仍然友好。馬浚偉於志雲捲入官司後有通電話，希望對方冇事，亦有繼續為對方祈禱。2019年時馬浚偉因入行26年開個唱，陳志雲都係嘉賓之一，不過今次《幸福 · 春夏秋冬》Ma’s Ter Mic演唱會志雲就睇都冇去睇，唔係仲係咪朋友呢？

圖片來源：影片截圖

{{hket:youtube id="ubJuJohd_jg"}}{{/hket:youtube}}