《印象西湖》令我感動

「上有天堂，下有蘇杭」，中國七大古都之一嘅杭州，以風景秀麗見稱。十幾年無踏入過杭州，西湖依然美麗，再遇啱西湖24個荷花區荷花盛開，塊塊荷花葉又大又綠油油，「接天蓮葉無窮碧，映日荷花別樣紅」嘅景象盡收眼底，我即刻諗，如果望住呢個景，食我最愛嘅荷葉飯，加碗西湖牛肉羹就正囉！係咪覺得我好俗氣呢！嘻嘻！

嚟杭州觀賞由張藝謀執導嘅《印象西湖》幾乎係必備節目。入場時，工作人員向每位觀眾派發一個掛喺頸嘅機器，我呢個鄉下人以為係因為戶外天氣熱，嗰嚿機器係一部風扇，原來係一個會噴香味嘅機器！嘩！呢個show就係要令你完全感受色、香、味！真厲害！

《印象西湖-最憶是杭州》係以西湖為舞台，張藝謀導演帶領嘅團隊，運用最新技術創作，將舞台設置於西湖水下3厘米處，以虛幻嘅西湖景色片段構成。內容有交響樂、舞蹈、越劇、古琴、大提琴、鋼琴等，中西合璧，結合芭蕾舞演出等。隨住呢個西湖做主角嘅水上舞台，呈現9個唔同嘅節目，當其中一項表演者唱緊《難忘苿莉花》時，你掛頸部機就會噴出苿莉花香味，詩情畫意，精美絕倫，簡直酒不醉人人自醉。

我第一次睇用真實山水風景做布景，以歌舞展示人文風情，一場表演有數百個表演者，仲用咗好多投影技術，將美輪美奐嘅科技同自然環境完美融合！出嚟嘅效果好震撼，睇到我好感動！

今次我旅遊時間緊迫，只係去咗西湖、靈隱寺、抱樸道院等，仲有好多出名旅遊景點未趕得切去！

杭州，等我呀！I will be back！

（本欄逢周四刊登）