熱得異常 提防中暑

全球氣候異常情況日漸嚴重，氣候系統變化嘅自然因素，最主要係太陽輻射，佢係驅動地球氣候引擎嘅燃料，當太陽活動周期加強時，太陽黑子隨之增加，意味着強烈嘅磁場形成，向地球釋放嘅輻射亦增加，令地球溫度升高。

全球暖化，導致地球極北土壤本來長年冰封亦開始融化，原本「永久凍土層」（permafrost，又稱永凍層）內已死亡數千年嘅動植物腐爛，釋放出大量溫室氣體（二氧化碳），加快全球變暖速度。再加上城市建築物密集，植物又少，混凝土多，柏油路面吸熱快而熱容量小，造成表面溫度高，所以都市比鄉村更熱。

我哋人類生活需求，導致「溫室效應」，亦係天氣變熱嘅一大關鍵因素。例如工廠、車輛、垃圾等等所產生嘅大量氮氧化物、二氧化碳、煤炭同粉塵等物質，因吸收環境中熱輻射能量，從而令大氣進一步升溫。所以今年勞工處亦推出「工作暑熱警告」，提供相關警告級別，建議從事唔同勞動量嘅朋友作出合適嘅工作同休息時段。

真係唔講得笑㗎，正所謂「光加熱」就等於火，「熱加濕」可以熱死我！中暑真係可以死得人，所以絕對要小心關注。

喺我哋日常生活環境中溫度及濕度，會對人體造成唔同程度嘅影響。當外界環境嘅溫度比體內溫度高時，身體藉住傳導及散熱嘅效果會變差；或者濕度過高，不利人體排汗及散熱時，就好容易會發生「熱傷害」，尤其係嬰幼兒、65歲以上長者、慢性病患者、服用藥物者、戶外工作者、運動員、喺密閉空間工作者及過重者等，都屬於高風險族群，所以大家千祈唔好忽視防暑措施呀！（本欄逢周四刊登）