流水落花︳鄭秀文人生感圓滿唔恨被嗌媽媽 陸駿光體會做天后老公有壓力

Sammi鄭秀文上月憑電影《流水落花》，獲得第29屆「香港電影評論學會大獎」的最佳女主角，並入圍角逐7月舉行的金像獎影后，被外界視為今年大熱門。她聯同該片男主角陸駿光接受訪問，一齊分享拍攝的感受，及對於戲中講述寄養家庭的個人睇法。

{{hket:ul-video id="7639"}}{{/hket:ul-video}}

{{hket:inline-image name="0001-24.JPG"}}{{/hket:inline-image}}

{{hket:inline-image name="SAMMI1214.jpg"}}{{/hket:inline-image}}

{{hket:inline-image name="SAMMI1215.jpg"}}{{/hket:inline-image}}

《流水落花》講述陳天美（鄭秀文 飾）和何彬（陸駿光 飾），透過莫姑娘（談善言 飾）申請成為寄養家庭，13年來照顧不少有問題的小朋友，而天美姨亦背負一些過去，一直無法磨滅喪子之痛，加上老公出軌等問題。提到有否將現實夫妻相處感覺融入角色內，Sammi說：「呢個角色人物相當唔似我真實，佢性格比較硬，好似唔識笑。我設定呢個人物經歷人生咁大傷痛，已經幾乎遺忘咗笑係咩嚟，直至佢遇到比較有緣分嘅小花（吳祉嶠 飾），一個真正佢想領養嘅小朋友，先至喺戲入面有第一個笑容，就係一句『媽媽』，佢不自覺咁笑咗出嚟，係成套戲第一個笑容，呢個唔係好似我真人，天美姨係一個乜都內藏，乜都唔講、唔表達，現實生活嘅我係乜都表達，返到屋企係好多嘢講嘅人，所以好難將我真實個性擺入呢個戲。（平日溫柔得多？）人嘅個性係好立體，唔係一面倒溫柔，有啲人表面溫柔，內裏就硬淨到不得了，有啲人就表面硬淨，內裏卻不堪一擊…，可以講我係一個混合體，應要硬淨嘅時候會企得穩，應有嘅溫柔都會有，應有嘅人性脆弱都會有。」

黃心穎親填全英文歌詞自嘲吐心聲 鄭秀文大方回應：應有機會去開始【下一頁】

至於有否期望有日有小朋友嗌媽媽？Sammi表示：「唔期待！（拍完戲有被激發起？）覺得上天唔需要（我）有呢一瓣，覺得每個人對於愛嘅體會又唔一樣，有啲人可能真係要通過做媽媽就可以complete人生，但係我完全無呢一瓣，覺得我人生真係非常之complete。同埋而家搵到我非常之理想嘅生活模式，都有自己嘅另一半，跟住又有啲寵物，對我嚟講已好足夠，因為我需要絕對自由，無論精神上、肉體上或者時間上嘅自由，所以有小朋友嘅生活好唔啱我。（會考慮領養或寄養？）以前有一刻真係諗過寄養小朋友，但一諗起自己個性都係唔得，都係養寵物好啲，自己對寵物感動好大，上天可能賦予唔同嘅人有唔同議題、唔同感覺，有啲人就對老人家或殘疾人士特別有感動，我就係對動物，呢個係上天畀我一個小小使命。（從來無想過做媽媽？）廿幾歲有諗過，但唔係強烈嘅，唔係我一定要，跟住到卅幾歲就冇，因為慢慢摸索之後好清楚自己要乜，所以唔使亂咁去摸索。」

2022年度香港電影評論學會大獎丨張繼聰鄭秀文獲封影帝影后 《給十九歲的我》獲頒最佳電影【下一頁】

陸駿光同Sammi處理角色上有些不同，他將兩公婆真實相處投放入角色，「唔多唔少都有少少，因為何彬對天美係小鳥依人，我同我太太就一時時，佢就小鳥依人啲，我有時會特登扮小鳥依人去𠱁佢，會將某一啲元素放入戲去做。（演Sammi老公有冇壓力？）做Sammi老公就有壓力，做天美老公就冇壓力，哈哈！記得廿年前訓練班出嚟實習時，成班同學喺紅館有個騷要做，嗰時Sammi已經係天后，佢喺前面唱歌，我哋成班同學就喺後面扮樹，咁樣睇就會有壓力，但喺角色上演出就冇壓力，呢年事係幾神奇，隔咗廿年有機會合作做夫婦。」

鄭秀文做「寄養家庭」學習放手 愛不是擁有：貓咪豐富了我的生命【下一頁】

對於外界讚賞Sammi今次演出不帶半點「鄭秀文」個性與特質，往後演戲之路會否朝這方向發展？Sammi說：「由我開始冇拍咁多喜劇時候，成日都好似銳意、專登去搵啲突破挑戰，一定要變成唔係『鄭秀文』，成日好似畀『金鐘罩』罩住自己，總之每部戲都要咁，好似整大個鼻都好，令到自己係唔同。其實演戲唔係咁樣，而係要點complete個角色，無論角色有冇似你嘅一部分，就算完全唔似你都好，只要好好complete個角色就得，那管角色似番你真人又如何？唔代表你做得唔好，只不過今次咁好彩，遇到一個角色睇唔到我自己。」

（↓點擊放大睇圖片↓）

Sammi指戲內有不少吸煙鏡頭，加上導演及劇本冇刻意神化，冇將天美姨美化成天使，令其角色變得很立體，「甚至最初講佢或多或少係為錢而做，好鍾意呢啲設定，講說話都係粗聲粗氣，對老公固然之係咁，對小朋友亦唔係溫柔，就係有咁前設令到角色有血有肉，觀眾慢慢睇落就進入天美姨內心世界，知道佢有好大創傷，有佢說不出嘅痛，正因係「大聲講嘢唔代表冇禮貌」，看似一個好粗鄙嘅媽媽，竟然內心有一個咁大愛，去照顧非血緣嘅小朋友。好希望觀眾睇到作為一個媽媽嘅大愛，呢個大愛係呢套戲好重要嘅一樣嘢，希望讓更多人明白咩係寄養家庭，其實戲入面亦講好多嘢，包括夫妻嘅關係同心結，丈夫嘅外遇，點樣放下釋懷，透過寄養家庭令小朋友有番母愛，而呢個失去兒子嘅母親點樣透過呢班小朋友治療自己。」

撰文：梁榮達

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】