信和葵涌工廈次季落成 BDx承租建大型數據中心

近年香港政府積極發展創科產業，其中一項重點係吸引外資來港。黛安聽聞，信和集團位於葵涌嘅全新工業項目「永基路38號」將於今年第二季落成，並已獲亞太地區發展速度最快嘅數字交付平台之一BDx承租，將建設高達16MW嘅超大規模數據中心。

「永基路38號」樓高18層，總面積達19.1萬平方呎，大廈嘅特點係採用咗好多配合可持續發展嘅技術，例如智能無觸式升降機按鈕、設置電動車充電裝置等，天台同大廈外牆亦注入綠化元素，例如與本地養蜂保育團體合作喺天台設「城市養蜂箱」，又會租畀本地環保磚公司及水耕種植公司等綠色產業。信和集團資產管理董事蔡碧林相信，BDx與信和嘅合作將可帶嚟最新嘅綠色技術，進一步推動本港成為亞太地區嘅數字中心。