超級好命婆

假如平時唔多睇電視或者報紙嘅你，呢段時間已故英女王嘅國葬排場真係氣勢磅礴，你應該會緊貼睇住成個過程。我透過熒光幕，被莊嚴嘅儀式、英國國民對英女王嗰份愛戴及不捨之情所感動而落淚。香港人好親切咁稱呼英女王為事頭婆，而我覺得佢絕對係一個「超級好命婆」。

你知道乜嘢係好命婆？

傳統過大禮，上頭時會請來「好命婆或好命佬」，因為雙方嘅父母當天需要擔當被敬賀嘅角色，不能分擔其他工作，因此需要請「好福氣」嘅長輩幫忙帶領整個程序，包括介紹禮品、贈送禮品，以至上頭等儀式。

好命婆或好命公嘅人選，條件係︰1、配偶健在；2、夫妻恩愛；3、有兒有女。如果該好命婆/公上有高堂下有孫，三代甚至四代同堂，則是超級好命婆。

眾所周知，英女王同菲臘親王結婚70幾年，要一齊走過咁多個年頭絕對不容易，而英女王亦曾經表示靠「背後男人」菲臘親王，才能夠堅持佢長期喺高壓下嘅生活，佢亦提過菲臘親王係佢力量來源同精神支柱。好多女性貴族未必可以擁有愛情與婚姻，而且可以從一而終，呢個真係一個好大嘅福份。

英女王生前兒孫滿堂，同菲臘親王育有4名子女，並有8個孫和12個曾孫，祖孫之間嘅關係親厚，喺女王出殯時，佢哋個個表露出不捨嘅哀傷之情，連英女王伊利沙伯二世嘅兩隻柯基犬，同埋佢最喜歡嘅一匹小馬亦面露哀傷，參加女王嘅最後告別儀式。

英女王絕對係當今世上唯一嘅女性，可以成為「修身齊家治國平天下」嘅表表者！

（本欄逢周四刊登）