林希靈偏愛高佬陳安立拍拖頸痠 踢爆未婚夫愛霸廁所玩手機

前《東張西望》女主持林希靈上月在社交平台公布喜訊，分享男友陳安立（Brian）成功求婚一刻，公開幸福放閃，而婚禮定於今年12月舉行。這對準新人今次接受「快問快答」大考驗，測試二人的了解同認識程度，結果現場笑料大放送，林希靈爆未婚夫霸住廁所40分鐘玩手機，Brian就反擊話她性格勁心急；當要求他們互給滿意分數，Brian就給林希靈有80分，原因是滿分100分就不用結婚，餘下的20分是讓他們在未來日子一同探索，冧得林希靈鬼咁開心，大讚未來老公仔講得好。

{{hket:ul-video id="5724"}}{{/hket:ul-video}}

{{hket:inline-image name="DSC09861.jpg"}}{{/hket:inline-image}}

{{hket:inline-image name="lamheiling_277794010_526998142095112_1856770194784826316_n.jpg"}}{{/hket:inline-image}}

林希靈同陳安立（Brian）這日接受《晴報》專訪，大玩「快問快答」遊戲，二人表現相當合拍，不時深情對望，流露出幸福溫馨神情。當被問到對方的優點？林希靈表示：「佢無咩脾氣，成日都好正面、好開心，同佢講我今日返工點點點，佢會安撫同做啲嘢令我開心，譬如出去運動打波、打機或者睇電影，好叻令我好開心。」Brian欣賞林希靈擁有超高EQ，感覺似海棉可以吸收好多負面能量，大家相處好簡單，不需要太多擔心。

正義女神封盤丨林希靈接受男友海邊蝦碌求婚 陳安立：「唯有用餘生慢慢再説」【下一頁】

至於另一半的缺點，林希靈爆笑表示：「佢去廁所去好耐，成日攞埋個電話入去打機，係可以沖梗涼都可以打機同睇YouTube，一去就去45分鐘，試過有一次40分鐘都未出嚟，佢話屙屎，但我入到去發現佢廁所板都未揭開，佢坐喺廁所板上面打機。」Brian即場解釋：「我幾鍾意自己屋企嘅洗手間，感覺好Relax嘅地方，同埋無人打擾你嘛…可能跟得一個人多，佢而家都會攞個電話入去，仲勁過我，一路沖涼一路喺度睇韓劇。佢就有個好大缺點，就係好心急，講嘢、行路都好急，我隻腳比較長，有時佢行路快過我，尤其是當佢有目的，去一個地方買嘢就會行得好快，好似火箭咁。」

談到對方給自己第一個印象，林希靈說：「我一路以嚟有留意到佢，我屋企人好鍾意睇運動節目，好幾年前佢同好多香港運動員做一個競技節目，初頭第一眼以為佢係運動員，呢個男仔咁靚仔，跟住搵佢個IG望吓，咁就認識到佢，真人真係幾靚仔。」Brian回憶第一次約會是去睇棟篤笑，覺得一個女仔如果有幽默感又識得笑，相信會是一個好女仔，於是當日就邀約林希靈，結果發現真人同電視上見到的《Think Big》Crazy姐姐激似，同樣Crazy又開心玩得的女仔，全部都很吸引到他。

《東張西望》主持丨林希靈黃愷怡兩大女神孖住跳槽 拍李臻為香港開電視主持抗疫節目【下一頁】

林希靈昔日是無綫《東張西望》女主持，有「正義女神」的稱號，而Brian身為ViuTV靚仔小生，曾給人感覺處於敵對電視台關係。Brian表示：「我哋以前無刻意放閃，或者刻意地下情唔畀人知，我哋拍拖都好公開，無論身邊朋友同記者都知道，我哋又無好高調要接受訪問。娛樂圈又有啲不成文規例，你未結婚就大家都唔會講，唔知拍拖一兩年就散。所以真係結婚認定咗，不如先做訪問，呢啲時機做又Ok。」林希靈指舊公司從無干涉她的私生活。

不過他們身高的差距又成為另一焦點，林希靈笑說：「我上一個男朋友真係193高，我係鍾意高佬，可能因為自己細粒，好羨慕啲人好高，但發覺我哋一齊咗之後，佢成日要耷低頭望我，我又成日岳高個頭望佢，我哋成日條頸都好攰，同埋錫嘅時候有時見佢擘開兩隻腳。」Brian坦言無想過另一半要有幾高，喜歡林希靈現時身高，嬌滴滴又性格討好。

（↓點擊放大睇圖片↓）

追問婚禮現時籌備進度？他們透露現時只訂了場地日子，其他事情仍未落實，「我哋屋企人都係好簡單，唔會要我哋一定要跟足傳統，最梗要我哋開心。我哋兩個有少少希望，就係朋友開心，因為結婚日子比較近聖誕節，想朋友好似嚟gathering，似去聖誕Party咁開開心心，反而有斟酌吓要唔要加幾隻火雞畀大家切吓。」他們笑言趁婚禮的浪漫氣氛下，讓單身朋友互相認識，成功撮合到情侶最好不過。為何有結婚衝動？Brian說：「拍拖無幾耐已經覺得佢係結婚對象，想同佢成家立室，一路因為工作未有合適時機，去到今年年頭差唔多一齊咗5年，覺得係人生另一個階段，呢個timing都幾好。同埋小朋友都係其中諗法，我哋都鍾意小朋友，希望有小朋友。」林希靈擔心他們年紀太大時候，不能夠陪小朋友跑，表明「搞唔掂」就會去雪卵。

撰文：梁榮達

攝影：何家賢、林君茹

場地：Harlan's (The ONE)

化妝：（林希靈）Chloe Yu（陳安立）Yuki

髮型：（林希靈）Jackson Chui（陳安立）Ryan

服裝：agnés b.，SPORT b.

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】