伍詠薇原諒練海棠自詡「資深食家」 真心愛翁江培：冇佢我「華燈初上」

由林柏希主持嘅網上平台BOX channel節目《月傾會》，最新一集請到伍詠薇做嘉賓，伍姑娘知無不言、言無不盡，喺節目中妙言連珠。

同場加映：  REBOUND丨Alton隔7個月先覆短訊認衰仔 AK稱入行爆忙感激圈外老友諒解

{{hket:ul-video id="5540"}}{{/hket:ul-video}}

入行33年嘅伍姑娘先大爆兩個曾經令佢發晒脾氣嘅對手：「兩個字！男人！兩個！失蹤唔到、另一個飲醉！」男星A玩失蹤、男星B就入廠拍劇拎住汽水罐，原來入面係酒，問伍姑娘係咪亞視年代發生嘅事，佢就話：「我仲去得邊度呀？」伍姑娘畀咗「芳華絕代」四個字提示，但就始終冇爆兩個男星嘅真正身分。

伍姑娘又自爆讀中學嗰時被踢入三合會，曾1個打14個，自稱「勁過甄子丹」。伍姑娘感情上面都曾行錯路，年少輕狂時曾與五個左右嘅有婦之夫交往過。伍姑娘1989年亞洲小姐競選出身，當年冠軍係翁虹、亞軍係萬綺雯、季軍係趙靜儀，頂頭大熱嘅伍姑娘只獲「最上鏡小姐」。事隔多年，伍姑娘笑談當年最唔妥邊個：「又係兩個字呀！翁虹其實係炒作到我同佢唔啱咋嘛！冇乜特別憎，當時可能憎幾嘢咁囉，即係可能覺得佢咁樣撥吓啲頭髮，（覺得對方）作狀；萬綺雯『耶』一聲咁樣，作狀，即係呢啲囉！」

{{hket:inline-image name="19.png"}}{{/hket:inline-image}}

同練海棠結婚廿年，真性情嘅伍姑娘自言性生活少咗好多：「因為對咗同一個樣二十年，你試下對一個女人二十年，靚到李嘉欣咁樣呀，都要搵阿伍詠薇啦！」不過佢就冇講實數，搞笑帶過：「八年都有一次嘅！」提到當年練海棠曾被影到同妙齡少女出街，伍姑娘選擇原諒，佢話：「我個人自己食嘢都……我係唯靈（香港資深飲食評論家），哈哈哈！我係冇嬲，我反而第一係諗吓自己，呢件事發生一定有原因，自己有咩問題，有冇問題，有問題，咁佢更加有問題啦，所以你嘅問題大啲，我嘅問題都有我嘅問題存在，大家商討囉，傾得埋就合，傾唔埋就分手！」

最後提到亡夫翁江培，伍姑娘話如果當年唔係翁江培提議佢選亞姐，佢好大可能已經行咗另一條歪路：「我成日諗，我做乜嘢呀，我可能『華燈初上』咗！如果冇支明燈點過我，我應該會行歪路多，我覺得應該會做咗啲名媛呀，名媛唔係話壞呀吓，名媛之前呢，我應該會做咗，送上千萬溫柔嗰啲囉，舞小姐囉！」

{{hket:inline-image name="1.jpg"}}{{/hket:inline-image}}

伍姑娘同翁江培婚後13日對方就心臟病逝，至今依然惦記亡夫：「邊個對過我好嘅人，我係記喺心裏面。翁生係我第一個明燈，亦都係我第一個丈夫，冇血緣關係但係最親密嘅人，佢教我最多嘢，係我老師亦都係我丈夫、係我明燈。如果冇佢教我點樣用第一張信用卡，我唔會去到今日咁有骨氣嘅伍詠薇！我係掛住你㗎，翁，所以我覺得啲人話我生命裡面咩遺憾，真係陰功呀，咩陰功啫，上天有好多嘢安排晒，我無悔第一段婚姻，因為第一段婚姻，令到我學識好多嘢，同埋係我真愛！」

圖片來源：大會提供
撰文：黃蘊姿

U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】